Heydər Əliyev Azərbaycan xalqının ümummili lideri: Nə qədər ki, Azərbaycan var məndə varam,mən isə Azərbaycanda əbədi olacağam!
Əsrlər keçəcək, nəsillər dəyişəcək, amma Ulu Öndər Heydər Əliyev xalqımızın yaddaşında, tariximizdə daim yaşayacaq. Təkcə ona görə yox ki, Heydər Əliyev dühası, onun siyasi kursu, ölkəmizə rəhbərliyi Azərbaycana, xalqımıza yalnız tərəqqi, inkişaf bəxş edib, Heydər Əliyev öz bilik və bacarığını rəhbərlik etdiyi bu dövlətin xoşbəxt gələcəyinin qurulmasına yönəldib.Həm də ona görə ki, Heydər Əliyev bütün ömrünü, həyatını dövlətinin, xalqının rifahı, intibahı üçün həsr edən, bu yolda canını belə əsirgəməyən liderdir.
Dahi lider, böyük şəxsiyyət Heydər Əliyev Azərbaycanın ən çətin və mürəkkəb dövrlərində hakimiyyətə gələrək ölkəsini, xalqını, dövlətini xilas edib, millətinin gələcəyini təmin edib. Heydər Əliyev öz əməlləri, fəaliyyəti, xalqımıza, dövlətimizə bəxş etdiyi azadlıqlarla əsl xilaskarlıq örnəyi nümayiş etdirib. 1969-1993-cü illərdə Azərbaycanın ən ağır dövrlərində hakimiyyət sükanına əyləşən öndər Heydər Əliyev həm də zəngin bir dövlət idarəçiliyi ənənəsi formalaşdırıb. Bu baxımdan 1969-cu il Azərbaycan tarixində daşıdığı missiya və spesifikliyi ilə oz layiqli və şərəlli yerini tutub. Bu dövrdə iqtisadi, sosial, ideoloji sahələrdə böyük problemlər yaşayan Azərbaycan keçmiş ittifaq dövlətləri sırasında ən geridə qalmışlardan biri idi. Mərkəzi hakimiyyət bu durumu düzəltmək və böhranı aradan qaldırmaq üçün müxtəlif addımlar atsa da, bu, faktiki olaraq mümkün olmamışdı. Yalnız Azərbaycan Kommunist Partiyası Mərkəzi Komitəsinin plenumunun qərarı ilə Heydər Əlirza oğlu Əliyevin Mərkəzi Komitənin birinci katibi seçilməsi ilə respublikada köklü, inqilabi dəyişikliklərin edilməsi üçün zəmin yarandı.
Azərbaycan öz mədəniyyəti, incəsənəti, milli-mənəvi dəyərləri ilə dünyada tanınmış bir ölkədir. Xalqımızın milli-mənəvi dəyərlərinin kökləri çox-çox qədim zamanlara gedib çıxır. XX əsrdə isə xalqımızın mədəni həyatında yeni bir dövr başlayıb. Bu, ulu öndər Heydər Əliyevin adı ilə bağlı olan bir dövrdür. Ulu öndər deyirdi: “Xalq bir çox xüsusiyyətləri ilə tanınır, sayılır və dünya xalqları içərisində fərqlənir. Bu xüsusiyyətlərdən ən yüksəyi, ən böyüyü mədəniyyətdir”. Məhz ona görə də ulu öndər hakimiyyətdə olduğu bütün dövrlərdə xalqın mədəniyyətinin inkişafını həmişə diqqət mərkəzində saxlayıb. Ulu öndər yaxşı bilirdi ki, milli dövlətçilik dəyərlərinin əsasını sağlam düşüncəli mədəniyyət təşkil edir. Sabahkı uğurlara yeganə təminat isə sağlam cəmiyyət quruculuğuna diqqət artırmaq, köklü mənəvi dəyərləri yeni nəslə və bütün cəmiyyətə daha dərindən və əzmlə aşılamaqdır. Dahi lider Heydər Əliyev mədəniyyəti xalqın böyük sərvəti hesab edirdi. Elə ona görə də mədəni-mənəvi dəyərlərin qorunması, təbliği və yeni estetik düşüncəyə məxsus əsərlərin yaradılması üçün mümkün olan hər şeyi edirdi.
Ulu öndər Heydər Əliyevin böyük diqqət və qətiyyətlə həyata keçirdiyi məsələlərdən biri də xalqımızın öz milli, tarixi köklərinə, ənənələrinə qayıdışı, dəyərlərimizin yenidən bərpası idi. Bu mənada illər idi ki, qadağan olunmuş tarixi bayramlarımızın yenidən qeyd olunmağa başlanması, dini dəyərlərin bərpası kimi o zamankı dövrün reallaqları ilə qeyri-mümkün görünən işləri Heydər Əliyev cəsarətlə görə, həyata keçirməyə müvəffəq ola bilibdi. Digər tərəfdən, Azərbaycan dilinin dövlət dili kimi elan olunması və bu məsələnin 1978-ci ildə qəbul olunmuş Konstitusiyada təsbit olunması Azərbaycan xalqının milli kimliyinin özünə qaytarılması baxımından atılmış ən önəmli addımlardan idi. Tarixi şəxsiyyətlərə münasibətin dəyişdirilməsi, Azərbaycan tarixində öz xidmətlərinə görə fərqlənib, seçilmiş insanların layiqincə dəyərləndirilməsi Ulu Öndərin “Qoy ədalət zəfər çalsın” şüarı altında göstərdiyi genişmiqyaslı və çoxşaxəli fəaliyyətinin başlıca istiqamətləri idi.
Taleyini, ömrünü Azərbaycana, xalqımıza həsr edən Ulu Öndər Heydər Əliyev 1982-ci ildə SSRİ Nazirlər Soveti sədrinin birinci müavini vəzifəsinə təyin olunaraq Moskvaya gedərkən də, fəaliyyətinin sonrakı dövrlərində də daima Azərbaycanla bağlı olmuş, fəaliyyətini konkret bu mərama yönəldibdi. Bakıda 1990-cı il 20 yanvar hadisələri, buna paralel olaraq, Ermənistan silahlı qüvvələrinin öz himayədarlarının köməyi ilə Azərbaycan torpaqlarını işğal etməsi, ölkədaxili çaxnaşmalar, silahlı qiyamlar, iqtisadi böhran yeni yaranmış bir dövlətdə yaşana biləcək çox ağır hadisələr idi. Bu xaotik dönəmdə ölkənin də, xalqın da, dövlətin də taleyi şübhə altına alınmışdı. Azərbaycanı xilas edəcək böyük şəxsiyyətə, bacarıqlı siyasətçi və dövlət xadiminə qaçılmaz ehtiyac var idi. Xalqın bütün təbəqələrinin “Heydər baba, bizi xilas et” şüarları ilə çıxışı, 91 nəfər Azərbaycanın görkəmli ziyalısının tarixi müraciəti xalqın yekdil rəyi və səsilə dahi şəxsiyyət Heydər Əliyevin yalnız xilaskar kimi göründüyünü təsdiq edir. Ulu öndər Heydər Əliyev bütün varlığı ilə sevdiyi xalqının, vətəninin çağırış nidasına səs verərək yenə də növbəti dəfə tarixin axarını dəyişdirmək, xalqa, ölkəyə gün ağlamaq missiyası ilə hakimiyyətə öz mübarək qədəmlərini atdı: xalqı hakimiyyətin mənbəyinə, ölkəni inkişafa, dövləti qüdrətə çatdırdı.
Ulu öndər Heydər Əliyevin 1993-cü ilin iyununda hakimiyyətə qayıdışını Azərbaycan müstəqilliyinin yeni tarixində ikinci mərhələnin - dirçəliş mərhələsinin başlanğıcı kimi səciyyələndirmək lazımdır. Bu günün xalq tərəfindən əziz bayram kimi - Milli Qurtuluş Günü olaraq qeyd olunması da tarixin bu qısa zaman kəsiyinin xalqın taleyində, müstəqilliyin qorunub saxlanmasında necə müstəsna rol oynadığını aydın göstərir. Dahi lider ölkəni təhdid edən vətəndaş müharibəsinin, qardaş qırğınının qarşısını aldı. Ulu öndər xilas yolunu, ilk növbədə, qarşılıqlı ittihamlara, hakimiyyət uğrunda gedən çəkişmələrə, qruplararası ziddiyyətlərə son qoymaqda, ədavət hissini unutmaqda və bununla da, xalqın milli birliyinə, vətəndaş həmrəyliyinə nail olmaqda görür və haqlı olaraq məhz bu istiqamətdə uğurlu tədbirlər həyata keçirirdi. Ölkə daxilində dövlətçiliyin möhkəmləndirilməsi, onun qüdrət və əzəmətinin nümayişi Azərbaycan dövlətinə beynəlxalq aləmdə də hörmət və inamı artırdı. Bir sıra ölkələr yalnız bundan sonra ölkəmizlə iqtisadi-siyasi münasibətləri genişləndirməyə başladılar.
Tarix sübut etdi ki, yalnız Heydər Əliyev nüfuzu, Heydər Əliyev siyasəti Azərbaycanı bütün bəlalardan qorumaq, müstəqil dövlətçiliyimizi yaradıb-möhkəmləndirmək qüdrətinə malik idi. Böyük öndərin dühasının yenilməzliyi onda idi ki, o, ömrü boyu xalqa arxalanmış, həyatının mənasını xalqa xidmətdə görübdü.Bu baxımdan “Mən bütün ömıümü xalqa bağışlayıram” amalı ulu öndər Heydər Əliyevin həyat və fəaliyyət missiyasının hərəkətverici qüvvəsi idi.
...Şübhəsiz ki, bundan sonra da Azərbaycana böyük siyasətçilər gələcək, bu torpaq bundan sonra da çox böyük və dahi şəxsiyyətlər yetişdirəcək. Ancaq onlar böyük xilaskar Heydər Əliyev zirvəsinə, Heydər Əliyev ucalığına qalxa, bu zirvələri fəth edə bilməyəcəklər. O zirvələr ki, zaman keçdikcə, hadisələrin istiliyi soyuduqca, daha aydın görünür. Və illər keçdikcə, nəsillər dəyişdikcə əbədiyaşar bir, lider olaraq Azərbaycan adının səsləndiyi hər bir yerdə, nəhəng siyasət üfiqlərində bütün aydınlığı ilə görünür.
Zaman sürətlə ötüb keçir, bizi gələcəyə, yeni dövrə, həyata götürür, amma keçmişdən gələcəyə bu uzlaşmada həyat məntiqi öz müdrikliyi ilə bizi dahi liderimiz Heydər Əliyevə daha da yaxınlaşdırır. Gələcəyin məntiqi idrakı da bizi dahi Heydər Əliyevin nə qədər müdrik, uzaqgörən bir lider olmasına heyrətləndirir, onun əzəmətli şəxsiyyətinə minnətdarlıq yaradır.
Ümummilli Lider Heydər Əliyevin Azərbaycan xalqının qarşısındakı ən böyük xidməti ölkənin gələcəyini etibar edə biləcək layiqli siyasi varisin cəmiyyətə təqdim etməsidir.Çox sevindirici haldır ki, Ümummilli Lider Heydər Əliyev tərəfindən əsası qoyulmuş və bu gün Prezident İlham Əliyevin uğurla davam etdirdiyi inkişaf strategiyası öz bəhrələrini verdi. Təmin olunmuş siyasi sabitlik və şəffaf dövlət idarəçiliyi ölkədə siyasi və iqtisadi islahatların uğurla aparılmasına yol açdı. Azərbaycan xalqı tarixi Zəfər çaldı. Ali baş komandanın rəhbərliyi ilə Qarabağ azad edildi. İndi yeni mərhələ başalayıb məcburi qaçqınlarımız yeni tikilmiş evlərinə köçür.
Ümumiyyətlə, Ulu Öndər Heydər Əliyevin adı ilə bağlı olan inkişaf strategiyası hərtərəfli şəkildə Azərbaycanı tərəqqiyə aparır, inkişaf vəd edir, qüdrətə qovuşdurur.(https://naxcivanxeberleri.com/bloq/azerbaycanin-muasir-inkisafi-dahi-lider-heyder-eliyeve-borcludur-29233)
Səttar ƏSGƏROV
Naxçıvan Muxtar Respublikası Prokurorunun köməkçisi
(Mətbuat xidməti üzrə) ədliyyə müşaviri
