Naxçıvan şəhərində yeni uşaq bağçası istifadəyə verilib

“Uşaqlar bizim gələcəyimizdir. Gələcəyimizi necə tərbiyə edəcəyiksə, böyüdəcəyiksə, ölkəmizin, millətimizin, dövlətimizin gələcəyi bundan asılı olacaqdır”, - deyən ümummilli liderimiz Heydər Əliyevin müəyyənləşdirdiyi dövlət - uşaq siyasəti bu gün ölkəmizdə uğurla davam etdirilir, uşaqların layiqli vətəndaş olaraq formalaşdırılması istiqamətində ardıcıl tədbirlər görülür. Muxtar respublikada da uşaqların təlim - tərbiyəsinə və təhsilinə xüsusi diqqətlə yanaşılır, bütün təhsil pillələri, o cümlədən məktəbəqədər tərbiyə müəssisələri üçün müasir şərait yaradılır.

Oktyabrın 5-də - Beynəlxalq Müəllimlər Günündə Naxçıvan şəhərində 8 nömrəli yeni uşaq bağçası istifadəyə verilmişdir.

Naxçıvan Muxtar Respublikası Ali Məclisinin Sədri Vasif Talıbov Beynəlxalq Müəllimlər Günü münasibətilə muxtar respublikanın bütün pedaqoji kollektivlərini, uşaq bağçasının istifadəyə verilməsi münasibətilə isə ailələri və burada işlə təmin olunanları təbrik etmiş, yaradılan şəraitdən düzgün istifadə olunacağına əminliyini bildirmiş, kollektivə işlərində uğurlar arzulamışdır.

Naxçıvan Muxtar Respublikasının təhsil naziri Rəhman Məmmədov, tərbiyəçi-müəllim Jalə Zeynalova və valideynlər adından Leyla Süleymanova çıxış etmişlər. Çıxışlarda muxtar respublikada təhsilin inkişafı sahəsində görülən işlərdən bəhs olunmuş, yaradılan şəraitə görə minnətdarlıq edilmişdir.

Sonra bağçaya baxış olmuşdur.

Məlumat verilmişdir ki, zirzəmi ilə birlikdə 4 mərtəbədən ibarət olan 210 yerlik uşaq bağçasında hər birində yataq otağı, mətbəx, tədris zalı olan 11 qrup fəaliyyət göstərəcəkdir. Uşaq bağçasının körpələr qrupuna 45, orta qrupuna 80, böyüklər qrupuna 40, məktəbəhazırlıq qrupuna isə 12 olmaqla, ümumilikdə, 177 uşaq qəbul edilmişdir. Binada müdir, valideynlər, tibb otaqları, 2 oyun zalı, tədbir zalı, metodik kabinə, dərzi, camaşırxana, təmiz paltarlar və paltardəyişmə otaqları, müəllimlər üçün yeməkxana, mətbəx, bufet, 3 anbar, metodist və təsərrüfat müdiri otaqları vardır.

Uşaqlardan Rüqayyə Qasımlı və Nur Talıbova şeirlər söyləmiş, tərbiyəçi-müəllim Xavər Abbasova yaradılan şəraitə görə minnətdarlıq etmişdir.

Tədbirlər zalında məktəbəhazırlıq qrupunun uşaqları ulu öndər Heydər Əliyevə həsr olunmuş, eləcə də vətənpərvərlik mövzusunda şeirlər söyləmiş, mahnılar oxumuş, rəqs etmişlər.      

Ali Məclisin Sədri uşaqlarla xatirə şəkli çəkdirmişdir.

Binanın həyətində uşaqlar üçün əyləncə və istirahət guşəsi yaradılmış, yaşıllıq salınmış, işıqlandırma sistemi çəkilmişdir.

Həmin gün Naxçıvan Muxtar Respublikası Ali Məclisinin Sədri Vasif Talıbov Naxçıvan şəhərinin Afiyəddin Cəlilov küçəsindəki 5 mərtəbəli, 18 mənzilli yaşayış binasında aparılan yenidənqurma və İcbari Tibbi Sığorta üzrə Dövlət Agentliyi binasının tikinti işləri ilə də maraqlanmış, müvafiq tapşırıqlar vermişdir.

 

 

 

 Naxçıvan Muxtar Respublikası

Ali Məclisinin mətbuat xidməti