Maarifləndirici tədbir keçirildi

May ayının 24-də Kolanı kənd tam orta məktəbində “Təhsil hüququ” və “Vətənpərvəlik” mövzusunda tədbir keçirilib. “Təhsil hüququ” mövzusunda keçirilən tədbirdə rayon prokurorunun köməkçisi III dərəcəli hüquqşünas İbrahim Mənsimov bildirib ki, Azərbaycan Respublikasının Konstitusiyasında göstərilir ki, bütün vətəndaşların milli və dini mənsubiyyətindən, dilindən, səhhətindən asılı olmayaraq, təhsil almaq hüququ var. Heç kim uşağa məktəbə getməyi qadağan edə bilməz. Dövlətimiz uşaqların təhsil hüququnu qoruyur. 2009-cu il 19 iyun tarixli "Təhsil haqqında Azərbaycan Respublikasının qanun"unda göstərilir ki, bu qanun vətəndaşların Azərbaycan Respublikası Konstitusiyasında təsbit olunmuş təhsil hüququnun təmin edilməsi sahəsində dövlət siyasətinin əsas prinsiplərini və təhsil fəaliyyətinin tənzimlənməsinin ümumi şərtlərini müəyyən edir, təhsilin ayrı-ayrı pillələri üzrə müvafiq qanunların və digər normativ-hüquqi aktların qəbul edilməsində baza rolunu oynayır. İ.Mənsimov təhsil sahəsində dövlət siyasətinin əsas prinsipləri,  təhsilalma formaları, təhsil pillələri və səviyyələri haqqında da ətraflı məlumat verib.

Ordubad rayon prokurorluğunda Naxçıvan Muxtar Respublikası Prokurorluğunun əməkdaşları tərəfindən vətəndaşların qəbulu təşkil olunub

May ayının 17-də Ordubad rayon prokurorluğunun inzibati binasında vətəndaşların qəbulu keçirilib.

Muxtar Respublikanın prokurorluq orqanları tərəfindən vətəndaşların müraciətlərinə xüsusi qayğı və diqqətlə yanaşılır, onların problemlərinin yerində öyrənilib həll edilməsi üçün təsirli tədbirlər görülərək, prokurorluq əməkdaşlarının əhali ilə birbaşa təmasda olma  halları artırılıb. Vətəndaşların müraciətlərinə baxılmasında əsas prinsip qaldırılmış problemlərin yaranma səbəblərinin, bu sahədə nəzərə çarpan nöqsanların dərhal aradan qaldırılması, aşkarlığın və obyektivliyin, ən başlıcası isə insana qayğının təmin edilməsidir.

Naxçıvan Muxtar Respublikası Prokurorluğu orqanlarında vətəndaşların qəbulu, onların müraciətlərinə baxılması məsələləri daim diqqət mərkəzində saxlanılmaqla, müvafiq qanunvericlik aktlarının və Baş Prokurorluq üzrə “Azərbaycan Respublikası Prokurorluğu orqanlarında müraciətlərə baxılması və vətəndaşların qəbulu işinin səmərəliliyinin artırılması haqqında” 01.11.2010-cu il tarixli 10/100 saylı əmrin tələblərinə ciddi əməl edilərək prokurorluqların inzibati binalarının qarşısında ərizə və şikayətlər üçün qutular yerləşdirilərək müraciətlərə dair xüsusi lövhələr yaradılıb.

Gənclər hərbi-vətənpərvər ruhda tərbiyə olunur

Şahbuz rayon prokurorluğunun təşkilatçılığı ilə may ayının 15-də Daylaqlı kənd tam orta məktəbində “Gənc nəslin hərbi-vətənpərvərlik ruhunda tərbiyəsi günün tələbidir” mövzusunda keçirilən tədbiri giriş sözü ilə açan məktəbin direktoru Yenibar Hüseynov IX-XI sinif şagirdlərinə tədbirin mahiyyəti haqqında məlumat verilib.

Daha sonra rayon prokurorunun köməkçisi, III dərəcəli hüquqşünas İbrahim Mənsimov ətraflı bildirib ki, vətənpərvərlik tərbiyəsi şagirdlərin vətəndaş kimi formalaşmasında, öz vətənini, ləyaqətini qorumaqda mənəvi təsir gücünə malikdir. Şagirdlərin vətənpərvərlik ruhunda tərbiyə olunmasında ulu öndər Heydər Əliyevin müdrik kəlamı mühüm əhəmiyyət daşıyır: "Hamımızın ümumi vəzifəmiz xalqımızda vətənpərvərlik, Vətən torpağına, millətə sədaqət, vətən uğrunda şəhidliyə hazır olmaq hislərini formalaşdırmaq, inkişaf etdirmək və təbliğ etməkdir".

Culfa Prokurorluğunun təşkilatçılığı ilə tədbir keçirilib

Rayon İcra Hakimiyyəti və Prokurorluğu may ayının 13-də Culfa şəhər körpələr evi-uşaq bağçasında "Uşaqhüquqlarının qorunması" mövzusunda seminar keçirmişlər. Tədbiri rayon İcra Hakimiyyəti Hüquq Şöbəsinin müdiri Elmar Həsənov açaraq seminarın mahiyyəti barədə iştirakçılara məlumat vermişdir. Rayon İcra Hakimiyyəti yanında yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Elçin Məmmədəliyev ölkəmizdə, o cümlədən muxtar respublikada uşaq hüquqlarının qorunması ilə bağlı həyata keçirilən tədbirlərdən danışmışdır.

Rayon Prokurorluğunun müstəntiqi İbrahim Hüseynov uşaq hüquqları ilə bağlı qanunvericilik tədbirləri mövzusunda çıxış etmişdir.

Bildirilib ki, xalqımızın gələcəyinin təminatçısı olan uşaqlarla aparılan işin əsas prinsiplərinin ənənəvi dəyərlərimiz üzərində qurulması, çatışmazlıqların operativ şəkildə həlli, hər bir uşağa nəzarətin mütərəqqi üsullarla həyata keçirilməsi muxtar respublikada mövcud vəziyyətin, əmin-amanlığın, stabil inkişafın qarşıdakı dövrdə də davam edəcəyinə əminlik yaradır.

Gənclər hərbi-vətənpərvər ruhda tərbiyə olunur

Babək rayon prokurorluğunun təşkilatçılığı ilə Babək qəsəbə 1 nömrəli tam orta məktəbdə “Gənc nəslin hərbi-vətənpərvərlik ruhunda tərbiyəsi günün tələbidir” mövzusunda tədbir keçirilib. Əvvəlcə məktəbin direktoru Əli Hacıyev tədbirin əhəmiyyətindən bəhs edib.

Daha sonra rayon prokurorunun köməkçisi, I dərəcəli hüquqşünas Elməddin Bağırov bildirib ki, dövlətimiz gələcəyimiz olan gənc nəslin Vətənə məhəbbət, xalqa, elinə və obasına hörmət, soykökünə sədaqət ruhunda tərbiyə olunmasına həmişə böyük məsuliyyətlə yanaşıb.Muxtar respublikamızda da gənclərin hərbi-vətənpərvərlik ruhunda böyüməsi diqqətdə saxlanılır, ümumtəhsil məktəblərində çağırışaqədərki hazırlıq fənni tədris olunur, məktəblərdə hərbi kabinələr fəaliyyət göstərir, gənclərin hərbi idman oyunlarında iştirakı diqqət mərkəzində saxlanılır.Gənclər də bu şəraitdən istifadə etməli,özlərini gələcəyin hərbi qulluqçusu,Vətənin müdafiəçisi kimi hazırlamalıdırlar.